Dalubang Mera

Cerpen BM : Fendi Chovi

Sudahri ajalan soko ding-madiding, mangkat baja laggu ka mordaja dhari romana. Are jareya, reng-oreng kodhu mele Kalebun se bakal nyeppowe tor daddi pangladhin se bakal ngator kaodhi'an e Disa.

Towa ngodha padha ajalan atong-rontong, nojju ka kennengan peleyan se esaba' e tengga lapangan se kaoladan ja' leggana, sebiyasa egabay kennenganna reng-oreng ngonju' kope'an otaba lajangan.

Mata are gi' ta' ngombar, Sudahri kaoladan kalowar dhari pagar romana. Oreng jareya aromasa kobater esebbut di-budhi. Saenggana aba'na kodhu ngantos abit e kennengan coccowan.

"Dika ampon mangkada, Ri." Saluki nyapa kancana se kaoladan ajalan e adha'na Bengkona.

Ngeding sowara, ngolok dha' aba'na, Sudahri neng-ngenneng ambu sakejja', atole ka oreng se nyapa.

" Pyah, Baddiyana Dika se ngolok." Saodda Sudahri, ngadebbagi badanna ka amperra romana Saluki.

Saluki manjheng e taneyanna sambi mandheng.  Robana Sudahri binar, pamesemma akaton bidha dhari are-are biyasana.

" Ta' laggu gallu', Dika pon mangkat. Neka mata are gi' ta' ngombar." Saluki nyaot ka Sudahri.

"Enggi. Bula mangkat lebbi nga-dha'. badha kalakowan laen," saodda Sudahri, lebbi majarna'.

"Cora'na tebbel sangona Dika." Saodda Sadiki sambi mesem ka Sudahri.

" Ha ha ha ... Teppa', bula neko esangowe. Sopaja daggi' ta' arassa pelka' otaba lapar." Sudahri ajawab, sanyaodda.

"Ba, ghânèko pole. Bula ta' epamelo dhu'uman dalubang merana, baramma Dika." Saodda Saluki, agaja' ka Sudahri.

" Ju taowo keya. Bula neko gun ollena ro'-noro' banne pandong otaba pangellarra. Dina daggi' pole adha-kandha, bula kaso tako' ta' olle korse dha' adha'," saodda, sambi ajalan ding-madiding santak.

E jalan nojju dha' kennengngan coccowan, Sudahri tatemmo ban reng-oreng se padha mangkat gu-laggu. Ta' ekenneng bitong, bakto jareya reng-oreng padha atong-rontong ajalan soko alir-biliran.

Sabelunna tanduk dha' ka tojjuwan, aba'na dibi' tacengnga' ngabassagi reng-oreng manjheng along-polong e babana terop.

Atena akaretteg. salaggu-lagguna aba'na mangkat. Nyatana gi' badha reng-oreng se jang lagguwan dhari aba'na dibi'.

"Ngantos abit rassana reya," karetegga atena, ngabassagi oreng ajarumbun, saleng selleg e labang maso'.

Ta' dhumadiyan, aba'na ta' duli eolog-olog molae gella'. Sokona arassa garingging, badanna egarassa molae ta' nyaman.

***

Bakto jareya oreng-oreng padha aserrowan, abidda ngantos, kabadha'an se arassa bakal torona ojan.

Are ta' ngombar akadi sabellunna. Kennengan se epasange terop ekarrasa cellep kalaban ngalesserra angen.

Saongguna rak peragga oreng apolong e babana terop se anaonge galimpo'na masrakat dhari panassa mata are, sebiyasa ngobal, kantos tana ekarassa panas elebadhi soko-soko, makadhadhak.

Baja laggu jareya banne sonarra mata are se ngombar e tabun temorra langnge'. Nangeng kaoladan ondhem se alir-biliran ater-poter e babana langnge'.

" Rassana torona ojan. Neko ondhem calemodan". Saodda oreng-oreng rampa sambi ngantos ologan teba.

***

Sudahri saamponna para' saejjam lebbi ngantos, eolok panitia kaangguy duli  ka adha'na Panitia. narema dhalubang pote aleppet se aesse gambarra  robana calon Kalebun se badhi epeleya dhaddi ro-sorona masrakat se bakal nyeppowe kaodhi'an  e Disa.

Sudahri manjheng, neggu' ban ngabassagi essena dhalubang se badha e tanangnga. Dhalubang jareya duli ebukka' laonan.

Takerjadda Sudahri, mowana pote olay, atena dag-dig-dug, ngetek egarassa sabadan. Dhalubang se eteggu' jareya gaggar dhari tanangnga.

" Badha apa, Ri." Saodda reng-oreng se badha e seddi'na, se gi' ta' mokka' essena dhalubang se aesse gambarra calon se bakal ecocco.

Sudahri akowak saranyengnga, duli aloncak buru, santak dhari kennengan jareya.

" Olar-olar, " kowagga aba'na buru, dhari kennengan jareya.

Oreng se ngabassagi kadaddiyan jadiya noro' buru. Korse, ettok, sakabbina se badha eadha'na eyantor, ngaltok jau ...

" Olar-olar," akowad sakellarra.

Dhalung jareya banne agambar robana calon pangladhin Disa. Nangeng agambar olar lajing. Ngekke'a ka aba'na.

" Olar - olar !!!

Sudahri buru berka' dhari kennengan peleyan. Tanto oreng-oreng se ngabas kadaddiyan jareya, noro' tako' ban tacengnga'.

****

Robiyana se ngabassagi lakena acar-kacaran e attas kasor lencagga, duli neggu' badanna lakena.

"Jaga, jaga, Mas ... !!!." Saodda, sambi mateppa' sarongnga lakena se kaoladan ta' notobi podhagga.

"Dhu, Guste ... ta' poko' olle dhalubang Mera ... !!! Saodda lakena, sokona sambi acar-kacaran.

" Dhu, ta' poko' olle dhalubang merah, mon enga' reya ...!!! Saodda lakena, ranyeng.

Ondhem e attas lannge' apajunge alam dunnya, sakobangnga kennengan kaoladan petteng calemodan.

" Jaga, jaga, badha apa, Mas ..!!! Saodda robiyana, noro' arassa ngetek, kobater ngabassagi kabadha'an lakena.

Sudahri jaga dhari tedhungnga, socana mera, badanna apellowan, ngangsor.

" Dhu, ontong engko' gun amempe", saodda, sambi neggu' dhadhana.

Sumenep, 10 Januari 2025

*****
Fendi Chovi, babbar e Kottha Sumenep. Pangladin jurupartela neng Rumah Literasi Sumenep (RULIS).

Pilihan